Staðarhólsá og Hvolsá

Viðtal við Rögnvald Guðmundsson

Veiði og veiðistaðir

Hvolsá og Staðarhólsá í Saurbæ í Dölum mætast áður en þær falla í einum ósi utan við Gilsfjörð. Norðan við ósana er varnargarður sem myndar lón sem stendur eftir þegar fjarar en sjór fellur upp í báðar árnar. Samanlagt vatnasvið ánna er 123 ferkílómetrar. Hvolsá er 9 km löng frá mótum Svínadalsár og Brekkuár sem sameinast við Fremri Brekku að ósum. Staðarhólsá er 7,5 km frá Gullfossi við Kjarlaksvelli að ósum. Árnar þykja báðar afar fallegar. Þær eru báðar laxgengar og þar hafa veiðst rúmlega 200 laxar á sumri en það er breytilegt á milli ára. Árnar eru þó mun þekktari fyrir mjög góða sjóbleikjuveiði og hefur veiðin farið yfir 1000 fiska þegar vel árar. Fáir ef nokkrir þekkja betur Hvolsá og Staðarhólsá en Rögnvaldur Guðmundsson veiðimaður. Rögnvaldur er fæddur og uppalinn á vatnasvæðunum nánar tiltekið í Ólafsdal. Þegar hann var 6 ára gamall flutti hann á bæinn Jaðar skammt frá Skriðulandi en faðir hans Guðmundur Rögnvaldssonar starfsmaður í Kaupfélaginu á Skriðulandi.

Veiddi fyrstu laxana 8 ára í Geithólshyljum 40-43

„Veiðieðlið er í genunum. Ég er alinn upp við stangveiði og skotveiði frá blautu barnsbeini. Pabbi var mikill bleikjuveiðimaður og var oft beðinn um að veiða á svokölluðum bændadögum á haustin. Bændurnir fengu hann til að veiða upp á helming. Þá var hann líka að hugsa um að ná sér í matinn fyrir fjölskylduna. Hann veiddi gríðarlega mikið á haustin og ég var með honum og sá þá aðallega um að rota og ganga frá fiskinum á meðan pabbi mokaði upp úr ánum. Ég fór með í minn fyrsta alvöru veiðitúr 8 ára gamall í Geithólshylji í Hvolsá, mér er þetta mjög minnisstætt. Það kom einhver bóndinn og þurfti að fá afgreiðslu í kaupfélaginu. Pabbi skildi mig eftir á meðan hann fór með bóndanum og ég kastaði út í. Ég setti strax í ágætis lax og var að glíma við hann þarna einhverja stund. Ég man það bara að þegar ég var búinn að landa honum titraði ég svo mikið að ég ætlaði aldrei að ná úr honum agninu. Þegar ég var búinn að jafna mig eftir nokkra stund settist ég aftur við bakkann, kastaði út í og náði að setja í annan lax. Ég landaði honum líka og lá síðan á bakkanum með laxana sitt hvoru megin við mig þegar pabbi kom aftur. Ég var auðvitað gríðarlega ánægður með sjálfan mig, segir Rögnvaldur og hlær. Hann bætir við að fyrsti laxinn hans hafi verið um 8 pund. Ég hef síðan þá veitt gríðarlega mikið þarna í ánum. Á tímabili var ég með þær á leigu. Ég ber því eðlilega miklar taugar til þessa skemmtlega vatnasvæðis. Síðast fór ég þarna fyrir rúmum þremur árum og þá var góð veiði í ánum.

Eftirminnileg rimma við 18 punda lax við Lónið

Rögnvaldur rifjar upp eftirminnilega veiðisögu. „eftirminnilegasta rimma sem ég hef átt við lax á þessu svæði var niður við lónið. Þetta var ansi skondið. Það var að byrja að falla að þegar ég sá laxa koma að í strenginn fyrir neðan stífluna. Þeir eru að velta sér frekar nálægt strengnum. Ég fer þangað niður eftir og kasta og set í stóran lax. Ég var í þrígang næstum búinn að missa hann því hann keyrði alltaf út á sama tíma og meira og meira féll að. Hann var gríðarlega öflugur og það tók upp undir hálftíma að berjast við hann því hann synti út í hafið og hafði endalaust svæði til að sprikla í. Hann hafði nánast allan Gilsfjörðinn. Ég gat ekki fylgt honum þar sem ég stóð í þara og sleipu en þetta hafðist á endanum og líklega er þetta ein erfiðasta barátta sem ég hef átt við fisk,“ segir hann og bætir við að laxinn hafi verið 19 punda grálúsugur hængur sem var nýkominn inn.

Lónið kemur sterkt inn

„Lónið er tilbúið en stíflumannvirkin voru gerð árið 1983 til að reyna þarna fiskeldi eftir að það kom duttu út veiðistaðir eins og Álftafljót, Lómafljót, Flæðilækur og raunar allir veiðistaðir upp að Brunnfljóti sem er neðsti veiðistaður í Hvolsá í dag. Áður gætti sjávarfalla alveg upp undir Lambanes í Staðarhólsá og að Spilduhyljum í Hvolsá. Þetta voru allt skemmtilegir veiðistaðir því fiskur sat oft eftir þarna þegar hann var að ganga upp. Það má samt ekki gleyma því að í staðinn kemur lónið sterkt inn sem veiðistaður. Helstu staðirnir þar fyrir laxinn neðst niðri við mannvirkið og um það bil 50 metra upp eftir. Það þarf að fara að honum ofarlega og kasta niður í stútinn. Ef þú labbar fram að brúninni að neðamverðu þá ertu búinn að fæla allan fiskinn. Bleikjuveiði er mjög góð í Lóninu sérstaklega þar sem Staðarhólsá fellur inn í lónið. Það sama má segja hinumegin þ.e. Brunnármegin niður með bakkanum þar sem Hvolsá kemur inn.“

Gríðarleg bleikjuveiði

„Bleikjuveiðin var gríðarlega mikil hér á árum áður en hefur minnkað nokkuð undanfarin ár þótt hún sé enn mikil. Það var kannski verið að ná 100 - 150 bleikjum á dag hérna í gamla daga. Það er öllu minna núna en samt sem áður er mikið af bleikju í ánum. Laxveiðinn hefur verið nokkuð mismunandi eftir árum. Þegar best var veiddust hér um og yfir 300 laxar á sumri. Þetta hefur minnkað eitthvað en að meðaltali hafa verið að veiðast um 200 laxar á sumri undanfarin ár. Ég man vel eftir þessum tíma þegar ég var strákur og að veiða með pabba. Það var svo mikið af fiski og svo mikil veiði að það voru skildir eftir strigapokar hér og þar, svo var fiskinum bara smalað,“ segir hann og brosir. „Olíufélagið var með árnar lengi á leigu og þær voru ræktaðar vel upp. Þegar lónið var sett upp var komið fyrir grindum í ánum við Áramótafljót í Hvolsá og rétt fyrir ofan Brúarhyl í Staðarhólsá. Laxinn var tekinn þar í gildrur og keyrður upp fyrir þar sem honum var síðan sleppt í ákveðnu magni þ.e. upp fyrir grindurnar. Afgangurinn átti síðan að fara í sölu þar sem þetta var bara hafbeit.“

Sitt hvor laxastofninn í ánum

„Þetta gat samt ekki gengið upp því það er sitt hvor laxastofninn í ánum. Svo var verið að sleppa fiski í Hvolsá sem átti heima í Staðarhólsá og öfugt. Þarna var verið að rugla lífríkið. Laxinn sem átti ekki heima í ánni lá hengdur í grindurnar. Seint og síðar meir gekk hann inn og var sleppt mikið ofar en stór hluti af honum sankaði sér beint niður í grindur. Eftir að grindurnar fóru og hafbeitinni var hætt hrundi veiðin. Það var búið að rugla lífríkið svo mikið og tók það tíma að ná þessu upp aftur. Laxveiðin hefur sem betur fer farið batnandi aftur á undanförnum árum. Þegar ég var síðast að veiða í ánum sumarið 2011 var fín veiði og tókum við 13 laxa á tveimur dögum og talsvert af bleikju.“

Meira af laxi Staðarhólsá en meiri bleikja í Hvolsá

„Staðarhólsá hefur alltaf gefið mun meira af laxi en jafnframt hefur verið mun meiri bleikja í Hvolsá. Ástæðan er fyrst og fremst sú að uppeldisskilyrði bleikjunnar hafa verið Brekkudalur og Svínadalur. Brekkuá og Svínadalsá sameinast og úr verður Hvolsá. Brekkudalurinn er sérstaklega öflugur þegar kemur að bleikjunni. Það eru tvær tegundir af bleikju þarna og það er auðvelt að þekkja þær í sundur. Brekkudalsbleikjan er stærri og þykkari. Hún er einnig rauðleitari. Svínadalsbleikjan er minni og ljósari. Veiði í Brekkuánni minnkaði verulega fyrir allnokkrum árum. Það eru áhöld um hvað olli því. Það var brú þarna á þjóðveginum sem var breytt í ræsi. Einhverra hluta vegna veigraði fiskurinn sér við að ganga í gegnum ræsið. Það var einhvers konar speglun þarna í ræsinu og fiskurinn hefur væntanlega haldið að hann væri að ganga inn í speglasal,“ segir Rögnvaldur og glottir.

Hvolsá í Dölum

2 Lón: Hægt er að keyra að þessum stað á góðum jeppum. Farið er framhjá Fóðuriðjunni eftir illa merktum vegslóða. Þessi vegur er ekki fær nema stórum jeppum. Þarna megin í Lóninu er oft hægt að fá góða veiði og auðveldara að athafna sig hér þegar hann er hvass á norðaustan. Fyrir nokkrum árum man ég eftir að veiðimaður fékk 3 laxa og fimm bleikjur þarna á stuttum tíma.

3 Lómafljót, 4 Flæðilækur og 5 Eyrarfljót: Gamlir veiðistaðir sem eru nú undir lóninu.

6-7-8 Brunnfljót: Þetta er neðsti veiðistaðurinn í Hvolsá í dag. Þarna er gríðarlega mikil bleikjuveiði og oft er hægt að hitta á mjög skemmtilega bleikjuveiði. Laxinn stoppar ekki mikið þarna.

9 Ármótafljót: Lítil á sem heitir Brunná rennur þarna í Hvolsána. Þarna breyttust aðstæður þegar Lónið kom. Laxinn sat gjarnan eftir þarna fyrir tíma Lónsins og þá var hægt að mokveiða þarna. Í dag er þetta alveg ágætur staður þótt hann sé ekki eins góður og var áður. Ég lenti oft í ævintýrum þarna í þá gömlu góðu daga. Árið 1988 tók ég 46 laxa þarna á tveimur dögum í ágúst.

10-11-12 Spilduhyljir: Mjög góður veiðistaður áður en lónið kom en veiðin hefur minnkað þarna á undanförnum árum þótt enn sé fiskur þarna. Þetta eru þrír blettir þarna sem enn gefa ágætlega. Miðstaðurinn heldur best fiski. Þar kemur vik í bakkann. Út af vikinu og um 5 metra niður með þeim bakka er besti veiðistaðurinn. Ég held að þessi staður sé lítið stundaður. Það þarf að labba svolítið til að komast þarna að.

13 Vaðklöpp: Mjög vanmetinn staður og lítið stundaður en leynir mjög á sér. Áin rennur hæg og breið og þú sérð ekki mikla breytingu á vatninu. Klöpp gengur út í ána hægra megin þegar þú horfir niður ána og myndar straumrof. Beint þarna út frá er oft fullt af fiski.

14 Hellufljót: Annar vanmetinn staður. Það er djúpt þarna og fiskurinn leynist. Það rennur lítill lækur í gegnum háa bakka. Beint út af þessum læk, svona 5-10 metra frá er aðalbletturinn. Þarna man ég eftir hörkugóðum veiðitúrum. Í maí veiddum við talsvert af sjóbirting þarna. Það hefur sjóbirtingur gengið þarna í gegnum tíðina.

15 Brúarfljót: Það er lítið um að vera þarna. Staður sem hefur ekki geymt marga fiska árum saman. Þó veiddi eitt holl tíu fallega laxa þarna árið 2010.

16 Silungapollur: Þarna getur legið lax á löngum kafla upp að Máskeldufljóti.

17 Máskeldufljót: Liggur saman með Silungapolli. Þarna hefur oft verið mjög sterkur laxveiðistaður. Það er ansi langt labb þangað og því lítið stundaður. Þarna hef ég oft gert mjög góða veiði. Áin kemur og rennur í hálfgerðan vinkil og niður með háum grasbakka.

18 Hvolshylur: Annar staður sem er lítið stundaður. Það er ekki mikið af laxi sem stoppar þarna. Oft er þó töluverð bleikjuveiði þarna og þá neðar í hylnum þar sem dreifist úr honum.

19 Skrauti: Þarna kastar maður bara yfir. Getur geymt einn og einn fisk en ekki mikið meira en það.

20 Múlafljót: Ef það er fiskur þarna þá er hann aggressívur. Allt í lagi að kasta yfir.

21 Bleikjubakki: Sama sagan þarna um að gera að prófa að kasta yfir. Ekki búast við miklu samt en ef hann er þarna þá er möguleiki að fá góða bleikjuveiði.

22 Hesthylur: Má segja það sama um Hesthyl og hina þrjá staðina á undan. Allir frekar svipaðir en þess virði að kasta þarna yfir.

23 Krókshylur: Lítið stundaður og ekki mikið af fiski svo vitað sé.

24 Stofuhylur: Ekki hefur veiðst mikið þarna í gegnum tíðina.

25 Eldhúshylur: Allt í lagi að kasta yfir þarna.

27-32 Prestbakkar: Pyttir og hyljir eru þarna í ánni. Prestbakkarnir eru svolítið breytilegir. Það þarf að lesa strauminn hverju sinni og kasta yfir þá.

33 Neðri-Stokkur: Gamall áveituskurður og fínn veiðistaður. Þetta er djúpt og þröngt. Neðst í Neðri-Stokk þar sem rennur út úr honum í vinkli er djúpur pollur. Þar eru alltaf lax og bleikja. Það bregst ekki. Þetta er samt sýnd veiði en ekki gefin. Það liggur svolítið erfiðlega til að kasta á hann. Þú nærð ekki góðu rennsli nema að fara niður fyrir staðinn og kasta upp og láta berast hratt á móti honum. Þannig hef ég náð töluvert mikilli veiði þarna.

34 Efri-Stokkur: Staður sem gefur ekki mikið af fiski. Það er eins og fiskurinn velji frekar að vera neðst í Neðri-Stokk.

35 Hornið: Þessi staður hefur gefið mér einna best í Hvolsá. Það rennur inn á háan bakka og malareyri öðru megin.

36-39 Hólmahyljir: Fjórir staðir sem eru mjög skemmtilegir. Þeir geyma fullt af bleikju og einnig talsvert af laxi. Þetta eru eyrarpyttir með háum grasbakka öðru megin. Þarna eru miklar innilegur og fiskurinn skríður gjarnan þarna undir bakkana. ef þú skoðar vel þá sérðu stirtlurnar og sporðana standa út undan grasbakkanum. Þá liggja þeir þar undir.

40-43 Geithólshyljir: Svipaðir að mörgu leiti og Hólmahyljirnir. Þetta eru staðir sem vert er að eyða töluverðum tíma í því þarna getur maður sannarlega veitt töluvert af laxi og bleikju. efri hlutinn hefur verið að geyma laxa og svo þegar fer að grynka niður á brotin þá liggur bleikjan þar.

44 Einbúi: Þessi staður kemur og fer veiðilega séð eftir því hvernig áin kemur undan vetri. Þetta eru eyrar sem breyta sér og maður veit raunar ekki alveg við hverju má búast.

45 Skriðuhylur: Annar staður sem breytist á milli ára. Samt getur leynst bleikja þarna.

46 Eyrarhylur: Oft mikið af bleikju þarna.

47 Selsbakki: Þarna er oft mikið af bleikju.

48 Húshylur: Annar breytilegur staður sem getur gefið bleikju. Margir fá sér labbitúr frá Húshylnum og niður í Neðri-Stokkinn og veiða oft vel bæði af bleikju og laxi.

49 Hvítadalshylur: Þarna leggst talsvert af fiski, bæði laxi og bleikju. Besti staðurinn er undir brúnni heim að Hvítadal, aðallega fyrir ofan brúna þar sem er hlaðinn kantur, gerður af mannavöldum.

50-54 Hvítadalsstrengir: Milli ármóta Brekkuár og brúarinnar að Hvítadal sem ég nefndi hér áðan, eru Hvítadalsstrengir. Fimm blettir þar sem hægt er að veiða lax og bleikju. Einn blettur geymir töluvert af laxi. Þegar gengið er að staðnum þá horfir þú á klett í bakkanum á móti þér. Niður með þessum kletti og um 10 metrum þar fyrir neðan er renna sem laxinn finnur sig í. Þarna hefur hann í gegnum tíðina verið í miklum mæli.

55 Ármót: Þarna er aðallega bleikja og oft mjög mikið af henni. Þarna hefur einnig verið eitthvað af laxi en þó í mun minna mæli en bleikjan. Þarna mætast Brekkuá og Svínadalsá. Brekkuá heldur sér betur í vatni en Svínadalsáin er háðari úrkomu. Brekkuá er kaldari og þar er sáralítið af laxi, líklega af því hún er of köld fyrir laxinn. Brekkuáin er eiginlega einn strengur niður úr og það er hvergi neinn strengur eða hylur. Það eru gljúfur með pyttum og pollum þar sem leynast laxar. Þarna er hins vegar fullt af bleikju.

56 Klapparhylur: Efsti veiðistaðurinn og Svínadalsmegin. Þarna er oft mikið af bleikju og einstaka sinnum hægt að hitta á laxa.

Við höfum rennt í gegnum Hvolsá og Staðarhólsá, svæðið er víðfeðmt og hægt að eyða löngum tíma í veiði á svæðinu. Það getur verið vissara að fara rólega að veiðistöðunum, fiskurinn getur verið mjög var um sig og styggur.

Staðarhólsá

Lónið, Álftafljót og Óshylur Margir hafa veitt vel í Lóninu en fara verður varlega. Þar eru bæði bleikja og lax og alltaf töluvert af fiski. Álftarfljót og Óshylur eru gamlir veiðistaðir eins og áður segir. Áður en veiðifélagið var stofnað lögðu landeigendur net við Óshyl vor og haust og fengu oft vænan silung.

59 Brúarhylur: Þetta er neðsti staður í Staðarhólsá. Þarna háttar þannig til að áin rennur meira Saurhólsmegin. Besti staðurinn þarna er hlaðinn kantur sem er fyrir ofan brúna. Þar ofarlega í hylnum, efst upp við stútinn, liggur lax gjarnan límdur við þessa hleðslu. Að mínu mati er lang best að veiða hann Saurhólsmegin því rennslið á flugu kemur þá að fiskinum við kantinn en ógnar honum ekki. Síðan liggur laxinn einnig við brúarstöpulinn. Þar undir er hola þar sem hann liggur oft. Þetta eru bestu staðirnir við Brúarhylinn þótt laxinn geti auðvitað legið víðar þarna.

60 Saurhólshylur: Ég kalla hann gjarnan Lambanesfljót. Þetta var sterkur veiðistaður í kringum 1990 en það hefur fjarað svolítið undan honum. Hann hefur fyllst talsvert af leir og drullu sem var ekki í honum áður. Það kemur skurður í bakkann Saurhólsmegin. Bæði efst þar sem rennur inn í hann, um það bil fimm metra niður af skurðinum var gríðarlega mikil veiði hér áður fyrr. Ég man að þegar ég opnaði ána 20. júní, árið 1991 þá veiddi ég þarna átta laxa á þessum bletti. Það er um að gera að kíkja þarna við.

61 Lambatangi: Getur einstaka sinnum geymt fisk í göngu en hann leggst ekki þarna. Þetta er staður sem er vert að kasta yfir ef þú ert þarna snemmsumars að veiða.

62 Svartibakki: Þarna gengur ekki mikið af fiski. Þú eyðir helst ekki miklum tíma þarna.

63 Torfubakki: Hefur gefið einn og einn fisk gegnum árin.

64 Stekkjafljót: Þarna er bugða sem er full af torfi. Það eru þrjár torfur sem hann liggur gjarnan ofan við og helst alveg í miðri bugtinni. Það er samt um að gera að kasta þarna yfir því það eru margir sem láta hann fara fram hjá sér.

65 Kjammi: Þessi staður er mjög breytilegur á milli ára. Getur dottið inn eitt árið en svo er ekkert að gerast næsta ár. Maður veit samt aldrei. Um að gera að reyna hann.

66 Móhellufljót: Þetta er einn sterkasti veiðistaðurinn í allri ánni. Neðarlega í fljótinu er mikil móhella í botninum og væntanlega er fljótið skírt eftir henni. Það eru mjög miklar innilegur undir móhellunni þarna á botninum. Þú kemur kannski þarna og sérð ekki neitt. Þá liggur fiskurinn undir móhellunni og felur sig þar. Svo kemurðu 15 mínútur seinna og þá er allt fullt af fiski. Þetta er gríðarlega skemmtilegur fluguveiðistaður. Ég gerði það nú stundum hérna í gamla daga að ryðja upp móhelluna. Svo fór ég og kom aftur eftir hálftíma og þá lá hann fyrir utan. Ég hef oft gert fína veiði þarna.

67 Brandshylur: Þessi staður er líkur Kjamma því hann kemur og fer. Það getur dottið inn þarna mjög mikil veiði og svo er hann handónýtur þess á milli. Ég man eftir því að ég fór með Guðmund minn þegar hann var 8 ára gamall. Það var talsvert af fiski þarna og lét ég strákinn fara efst í hylinn og dunda sér. Hann tíndi þá einn og sjálfur upp fimm laxa úr Brandshyl. Svo árið eftir var enginn fiskur þarna.

68 Hörðeyrarfljót: Þarna hefur alltaf verið mjög sterkur veiðistaður í gegnum tíðina. Besti veiðistaðurinn er efst í fljótinu og um 15 metra niður frá stútnum og með bakkanum. Öðru megin er hár grasbakki en hinum megin er eyri. Þarna eru torfur sem hafa hrunið úr grasbakkanum og liggja þarna niðri. Fiskurinn finnur sér skjól þar.

69 Krókur: Hefur ekki haldið mikið af fiski í gegnum tíðina. Þarna er hár grasbakki öðru megin og eyri hinum megin og torfur í honum, mjög svipað og við Hörðeyrarfljót. Einhverra hluta vegna hefur fiskurinn ekki fundið sig í króknum og þar af leiðandi leggst hann ekki þarna.

70 Langidráttur: Mjög svipað landslag og í Króknum og Hörðeyrarfljót. Þessi staður gefur alltaf einn og einn fisk en þá er það alveg við miðbik hylsins. Þar eru torfur sem hann hefur legið svolítið ofan við.

71 Frúarhylur: Staður sem er vert að skoða vel. Það rennur inn í hann þvert og þar ofan við er sýki þar sem hann liggur oft uppi. Á haustin gerði ég oft ágæta veiði þarna fyrir ofan. Snemmsumars liggur hann í strengnum niður með bakkanum. Á haustin er hins vegar líklegra að hann haldi sig í sýkinu fyrir ofan.

72 Símastrengur: Fallegasti staðurinn í ánni að mínu mati. Frábær staður fyrir fluguveiði. Þar rennur áin þröngt inn í hann og síðan víkkar hann og endar í vinkilbeygju. Þar getur fiskur legið alveg upp við stút og alveg niður á brot, töluvert fyrir neðan beygjuna. Aðalstaðurinn er þar sem straumurinn deyr út í um það bil miðjum hylnum. Það þarf samt að fara varlega þarna og passa sig á að styggja hann ekki. Það er fullt af torfum og stöðum þarna út í þar sem hann getur stungið sér á bak við. Í þessum hyl hef ég átt margar skemmtilegar stundir. Ég hef yfirleitt veitt á flugu þarna. Þetta er einn af mínum uppáhaldsstöðum og þarna hef ég gert feiknalega góða veiði. Sá stærsti sem hef tekið þarna var 10,2 kíló í kringum 1990. Ég þurfti að vaða á eftir honum og þetta var hörkubardagi en þetta var fallegur og stór lax og sannarlega þess virði að berjast við hann.

73 Hólmi: Þarna var ágætis veiðistaður en hann hefur ekki verið inni mjög lengi.

74 Réttarhylur: Þarna er einn stengur niður með bakka þar sem fiskur hinkrar kannski í en hann leggst ekki þarna.

75 Staðarhólshylur: Sterkur veiðistaður í gamla daga en áin hefur breytt sér og hann er ekki eins spennandi nú.

76 Gagnslaus: Þarna hafa veiðst fiskar en ekki mikið hinn seinni árin.

77 Laxapollur: Var gríðarlega öflugur veiðistaður en áin var færð vegna niðurbrots. Það var grafið í gegnum eyrarnar við hliðina, við það breyttist þetta mikið. Það myndast smá strengur þarna. Einstaka sinnum er hægt að hitta á lax en hann stoppar ekki þarna.

78 Rófugarðshylur: Þarna er sömu sögu að segja og um Laxapoll. Þarna veiddi ég oft gríðarlega vel í gamla daga en eftir að áin var færð hefur ekki verið eins mikil veiði þarna.

78a Kverngrjót: Þetta er ekki merktur veiðistaður en undir brúnni þarna er mjög oft fiskur. Laxinn leggst oft við brúarstöpulinn. Í gegnum tíðina hef ég veitt marga laxa þarna.

79 Grjótin: Staður sem er vanmetinn. Fáir fara þangað en ég hef oft gert feiknalega góða veiði. Áin rennur niður með hlöðnum grjótkanti. Steinar hafa dottið þarna út í ána. Um 20 metra kafla niður frá stútnum eftir grjótkantinum er yfirleitt alltaf fiskur. Eins og ég segi þá hafa menn lítið stundað þennan stað en ég fer alltaf þangað.

80 Birgishylur: Annar vanmetinn staður. Hann lítur ekki merkilega út og svo er þetta smá krókur sem menn nenna kannski ekki alltaf að labba að. Áin rennur að háum bakka og beygir svo niður með. Við hliðina á strengnum neðarlega, rétt áður en hann dettur út úr honum er djúpur bolli með grjóti í. Þar er alltaf lax. Sonur minn Guðmundur fékk þarna sinn fyrsta lax 6 ára gamall. Ég hélt í hettuna á úlpunni hans á meðan hann slóst við laxinn. Hann náði honum sjálfur á land en slagurinn tók um 20 mínútur. Það tók mig tvo daga að ná stráknum niður á jörðina því hann var svo montinn og mátti alveg vera það.

81 Heiðarbakki: Ég man ekki eftir að þessi staður hafi haldið fiski. Í seinni tíð hefur þarna fyllst svolítið af leir og drullu.

82 Þverfellsfljót: Þar rennur áin með háum grasbakka undir háu barði. Það hefur oft legið töluvert af laxi með torfinu af þessum háa bakka.

83 Bakkabót: Þarna er fátt spennandi að gerast en segja má að hér sé lognið á undan storminum.

84 Klapparfljót: Þetta er líklega aflamesti staðurinn í allri Staðarhólsá. Hérna var gömul brú yfir þjóðveginn sem er farin núna. Aðeins stólparnir standa eftir. Þetta er viðkvæmur staður. Þú verður að fara yfir nýju brúna sem liggur yfir ána og labba þar niður með þar til þú beygir inn háa bakka sem liggja á móti þér. Laxinn getur legið mjög ofarlega og því er mikilvægt að standa fyrir ofan hann. U.þ.b. 10 metrum fyrir neðan þessa háu bakka er stór pollur þar sem er steindautt vatn. Þar í grynningunni liggur oft mjög mikið af laxi. Menn verða að fara mjög varlega því það er auðvelt að styggja fiskinn. Það er mikilvægt eins og ég segi að vera fyrir ofan og kasta niður. Hann sér þig alveg um leið og þú kemur niður malarbakkann. Þarna hef ég veitt mikið af fiski í gegnum tíðina. Ég og sonur minn tókum sjö laxa á einum degi fyrir þremur árum.

84a Kjarlaksvellir: Þetta er ekki merktur veiðistaður en skáhallt út af bænum að neðanverðu hef ég oft gert ágæta veiði. Áin breytist þarna á milli ára. Þar eru stór grjót sem hafa búið til skemmtilega bolla. Þetta er staður sem er vert að skoða.

85 Gullfoss: Síðsumars leggst þarna oft mikið af fiski. Þetta er afar viðkvæmur staður. Best er að ganga upp með ánni frá bænum og fara yfir Traðardalsá, áin sem kemur niður Traðardalinn. Ganga síðan upp að fossinum þegar horft er upp ána. Þar kemur svolítil vík í ána og hún rennur úr fossinum hinum megin. Aðaltökustaðurinn er í kantinum þar sem áin rennur út úr fossinum.

86 Gljúfur: Efsti veiðistaðurinn er í Traðardalsá. Þarna uppi er töluvert af laxi. efst í Gljúfrinu er hylur sem gefur oft mjög vel. Hann er viðkvæmur og auðvelt að styggja fiskinn. ef varlega er farið er hægt að veiða mjög vel þarna. Það er svolítið erfitt að komast að þessu, nokkuð labb og getur verið erfitt að landa þarna. en það er vel þess virði að koma þarna. Ekki fjölsóttur staður, líklega sökum dálítið erfiðs aðgengis en ég mæli með þessum stað.

‍

‍

‍